Plantun de Prouvènço

Pèr coumpara dos planto d'encò nostre

Bidens tripartita & Scleranthus annuus

Bidens tripartita

Asteraceae Compositae

Noms en français : Bident à feuilles tripartites, Bident trifoliolé.

Descripcioun :
Lou canebe-d'aigo, pas tant coumun que soun fraire bessoun, aquéu rama Bidens frondosa, trachis sus lou limas de ribiero e d'estang. Fai de flour coumpausado pourtado pèr de long pecou e d'ounte raiounon de bratèio pulèu longo. La maje part de si fueio soun divisado, mai au contre de Bidens frondosa, que ié sèmblo proun, li divisioun an pas de vertadié pecou (fotò). Un autre biais pèr lou recounèisse èi de regarda la grano que sis espinulo van devers lou soumet.

Usanço :
En Asìo dóu levant, li fueio soun manjado cuecho coume de liume.

Port : Grande erbo
Taio : 20 à 150 cm
Fueio : coumpausado
Tipe bioulougico : Teroufite
Cicle bioulougico : Planto de l'an

Gènre : Bidens
Famiho : Asteraceae
Famiho classico : Compositae
Tribu : Heliantheae
Ordre : Asterales

Coulour de la flour : Jauno
Petalo : >6
Ø (o loungour) enflourejado : 1,5 à 2 cm
Flourido : Estiéu - Autouno

Sòu : Ca
Autour basso e auto : 0 à 200 m
Aparado : Noun

Liò : Ribiero - Roubino
Estànci : Mesoumediterran à Mountagnard
Couroulougi : Bourealo
Ref. sc. : Bidens tripartita L., 1753

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.